قصيدتي الجديده عنوانها " مخنوق "
مخنوق
ونفسي أقول كلام
فعل اللئام
ياحبيبتي مش هيهمنا
وان حاولوا يطفوا شمعنا
برضه مش هيهزنا
وحياة هواكي
وحبي ليكي
وعشقي ليكي
اللي جوه عروقي دايب
حالف أولع ألف قنديل للمحبه
وألف شمعه ف ايدين الحبايب
ياحبيبتي قلبي دايب
قلبي مفطور م الألم
ع اللي جرالك
ياحلوه عمري ماشفت زيك في جمالك
مقهور عليكي ياحبيبتي ونفسي أبكي
نفسي أشكي
نفسي أقول للدنيا واحكي
أحكي قصة حبنا
واحكي جمالك
واحكي نضالك
واحكي صبرك واحتمالك
واسأل واقول
اشمعنى هي تتئذي وهي أجمل ماخلق؟
زعلان عليكي والفَرَح مني اتسرق
مخنوق عشانك
وكل العاشقين
زيي عشانك
مخنوقين
حتى السما والأرض
برضه مخنوقين
حتى الشجر والزرع
برضه مخنوقين
صوت الجوامع
مخنوقين
جرس الكنايس
مخنوقين
مين عليكي ياحبيبتي مش زعلان؟
مين عليكي يامصر
لسه مش حزين ؟!!
تحياتي
شاعر الحياه : خالد أمين عارف
موضوع: "مخنوق " قصيده جديده لشاعر الحياه 
الإثنين 03 يناير 2011, 2:19 pm
