" أغضب " إلى الشعب الثائر

أغضب
لشاعر الحياه
خالد أمين عارف

أغضب وقول ياشعب يلّا كلمتك
أعلن وثور وارسم ملامح ثورتك
أغضب على الظلم اللي عشته سنين طوال
أغضب على البخت اللي مال
أغضب على سنين عشتها ف ذُل السؤال
أغضب

***
أغضب على اللي سنين باعوك
واللي خانوك
واللي مصوا الدم منك ورموك
أغضب على اللي جوعوك
وشردوك
وان قلت آه بيخنقوك
أو يقتلوك
أغضب

***
أغضب وثور ما أعظمك
كسّر يامارد قمقمك
إزعق بصوتك في السما
ولا حد يقدر يرغمك
أغضب

***
أغضب على الدم اللي سايل م الشهيد
أغضب على اللي ماتوا في قطر الصعيد
أغضب على اللي غرّقوا العباره واللي
حطوا في إيديك الحديد
أغضب على الغاز اللي رايح لاسرائيل
أغضب على أزمة مياه
وانت عندك أحلى نيل
أغضب على الليل الطويل
أغضب وثور
الفجر جاي بأحلى نور
ما عادش هيفيد السكات
ولا بُكانا على اللي فات
الخوف خلاص جوانا مات
وخلاص هيبقى لينا دور
أغضب

***
ياشعب ساكت من زمان
راضي بمذله وبهوان
أصمد وأثبت في الميدان
أوعى تخاف يوم م المسيخ
الحق لازم ينتصر
والظلم لازم يندحر
بالنور حروفك تتسطر
في كل صفحات التاريخ
أغضب