كنتي فين يا " لأ " لما جيت أقول " نعم "

عدد المساهمات : 115 تاريخ التسجيل : 01/01/2011

السلام عليكم ورحمة الله وبركاته

مبدئيا انا هتكلم عن التعديلات الدستوريه ورأيي الشخص علشان من أولها كده اللي مش عايز يقرا مايقراش
تفتكر ممكن ييجي يوم اقول لنفسي ياريتني "ما قولت لأ " واكتشف ان اللي قال نعم للتعديلات الدستوريه كان صح ؟
ممكن ليه لأ بس اللي انا اعرفه إني دلوقتي بقول لأ عن قناعه لكن اللي جاي ده في علم الغيب لأن ممكن برضه يحصل العكس واللي قال نعم هو اللي يندم ويقول لنفسه " كنتي فين يا لأ لما جيت أقول نعم"
المهم
انا هقولكم هقول لأ ليه ؟
أولا مينفعش اني اعمل عملية تجميل لجثه متعفنه ؟
ثانيا مفيش قوى سياسيه لها قاعده على الساحه حاليا غير الأخوان والوطني ومحدش يقولي الوطني تعيش انت لأني هقولك ان المتعلمين أو المثقفين فاهمين لكن احسبها على مستوى الأرياف مثلا أو الصعيد ، هتلاقي فيه عندك تعصبات قَبَليه وهتلاقي ان الناس هتعطي صوتها لنفس الشخص اللي كان متعود يعطيه صوته لمدة 20 سنه مثلا وبالتالي احنا كده بنساعد على ان الوطنى يعيد تشكيل نفسه
أما بالنسبه للاخوان فأنا مش ضد أو مع الاخوان كتنظيم أو كجماعه دعوية ولكن ضد اتخاذ الاهواء الشخصيه أو تغليب المصلحة الشخصية على المصلحة العامه لأن المصلحة العامه بتقول اني اعطي الفرصه لباقي القوى والاحزاب انها تظهر على الساحه ومحاولش اطغي عليها
ثالثا : لو قلنا نعم إيه اللي هيحصل .. المجلس الاعلى قال انه في حالة نتيجة الاستفتاء نعم سيتم إقرار إعلان دستوري بالمواد المعدله وعلى حد علمي إن الإعلان الدستوري ده بمثابة دستور مؤقت طيب يبقى البلد هتمشي تحت ال9 مواد المعدله دي لحين عمل دستور جديد طيب افرض اننا عملنا كده وانتخبنا رئيس جمهوريه وشكل لجنه لوضع دستور جديد وفي الفتره اللي اللجنه بتنشئ فيها الدستور الجديد حصل مثلا غزو على مصر مين وقتها له حق إعلان الحرب هتقولي رئيس الجمهوريه ، هقولك مين اعطاه الصلاحيه بكده هتقولي الدستور هقولك أنهي دستور هتقولي 71 هقولك إننا كده يبقى بنهرج لأن الدستور ده مجمد وقيس على ذلك ماشئت
عشان كده انا شايف ان مصر محتاجه دستور على نضافه لازم نأسس صح علشان نبني صح لكن اللي بيحصل ده مالهوش غير مسمى واحد ( شحبلاط في الشلاولاو ) ولو حد فهم الكلمه دي معناها إيه يبقى فهم اللي بيحصل في البلد ويبقى يكسب فيا ثواب ويفهمهولي

تحياتي
شاعر الحياه
خالد أمين عارف

[center]